Tain Cicing Penangkal Virus Corona
Olih: Suteja Narendra
Mara tiang ajin, rurung tiangě sagět bersih. Biasaně tain cicingě pajontol. Ada aně pendil makelengan, ada aně ěncěh makuah. Yěn mentas, pang gondong tiang cara tentara ngiwasin ranjau darat. Ber nyak cicingě kompak ngendig di rurung tiangě. Celekotokaně….
“Dadi tumběn nyak kedas rurungě Luh? Nyai mersihin?” kěto patakon tiangě dugasě mara enteg jumah.
I Luh makitukan.
“Men… Nyěn?”
Buin I Luh ngituk.
Běh…ngaě kěpo dogěn I Luh. Ulian meled nawang unduk tain cicing, kanti nyesedang tiang matakon.
“Sujatině nyěn? Ngupahang Nyai mersihin tain cicingě ento?”
Jani I Luh mara nyautin. Sinted, sepet, buka biu susu enu keped.
“Iiih…Nyěn kodag orahin Bli nyaup tain cicing? Ada stratěginya ento Bli! Jani nak jaman sosměd, ento manfaatkan! Cerdas dikit napa?”
Boě…gahul jani raosně I Luh…lěngkongě! Tiang nyumingkin kěpo…
“Kěn-kěn caraně? Kěn-kěn stratěgině? Nah kě, eda ngaě penasaran!” biiih…ber cara pelaib mimis brěn patakon tiangě. I Luh makenyem penuh mistěri. Ia ngenjuhin tiang hapě.
Ditu di hapěně, ia ngaě status di pisbuk kěně :
“Terungkap….Tain cicing ternyata dadi anggo borěh penangkal virus Corona!”
(Macang Rumah Cinta Seribu Jendela)
