Dueg Ulian Hapě Tablět

Olih: Suteja Narendra

Pianak tiangě uli mara bisa magaang suba bekelin tiang hapě tablět. Nawang tablět? To apa, hapěně lumbang telung langkat mrepat nyerakěn. Piiih…měměně apik pesaja, bilang atindak pianakně potrěka, apeluda di Facebook, Instagram, Twitter, pokokně ber dija dija ada potrěkan pianakně. Lega pesaja ia nepukin anakě koměn:
“Iiih… Lucunya děděk bayi”
“Gantengnya….”
“Anak siapa dulu dong… ”
Kenyem-kenyem měměně mamaca, cara bojog nyepsep Kopiko!

Jani ia suba kelas satu ěs dě. Nyansan dueg tur berpengetahuan luas! Joh pesaja ngajak timpal-timpal anjaraně. Suba lancar mamaca, cacep ngitung. Aně bacana di Google masih ngangobin pesaja: ěnsiklopědi, ilmu politik global, ěkonomi makro. Mběěě…celekotokaně wayah gigině!

Jani ia suba bisa nuturin anak kelihan. Umpami : dugas měměně ngorahin meli uyah ka tenten, ia nuturin :
“Mamah… Děděk kan masih anak-anak. Kalau disuruh suruh gitu, itu namanya ěkploitasi anak! Bisa dipidana!”
Mimih… Kijem bol měměně ningeh tutur pianakně. Dugasě orahina nulungin dadongně ngalap salak, kěně pasautně :
“Mamah…Tugas anak-anak itu belajar dan bermain. Bukan bekerja. Jangan rampas masa kanak-kanak kami. Itu ěksploitasi anak!”
Buin kinceh bol měměně. Saja mirib kěto, sing dadi jani mengěksploitasi anak. Pokokně baang ia apang lega menikmati masa anak-anak. Sing dadi tunděn, sing dadi wělang, sing dadi caplěgin, sing dadi cerek pintel. Bisa usak měntalně! Lěn cara tiang pidan, ajaka nebeg, matekap, melasah, kanti lempor entudě makerem di nyaranganě. Tonděn bin orahina ngalih saang, ngajang yěh, maang ngamah kucit….Piiiih…Diěkploitasi tiang pidan!

Dugas Umanis Galunganě, bibině teka mulih melali. Gědoh-gědoh ulian beling, suba tambis lekad. Pianak tiangě sagět wayah pituturně,
“Makanya, tante jangan berenang sama laki-laki. Lelaki terangsang, bisa ějakulasi. Dan sperma akan berenang masuk membuahi tante. Ya, gini jadinya!”

Makejang bengong…sepi buka jangkrik ketebin.

Sagět kurenan tiangě ngetor. Peluhně pesu pakritis. Kisi kisi ia ngaraos, “Aduh, kujang jani Bli? Ibi icang maměman di tukadě ajak I Blěki. Jangan-jangan….”
Tiang masi sing kalah makesiab. Katos magelekan, ngaraos pegat-pegat, “Belang bungkem pianak Nyaině jani!”

(Macang Rumah Cinta Seribu Jendela)