Hafal Pancasila?

Olih: Suteja Narendra

“Celekotokaně…calon Putri Indonesia sing hafal Pancasila…mau dibawa ke mana bangsa ini?” gerimutan basang tiangě mabalih tivi, dugas calon Putri Indonesianě blala-blělě nyambatang sila Pancasilaně. Běh, pelajahan ěs dě ento. I Wayan pianak tiangě kelas satu suba hafal di luar kepala.
“Nyai hafal pancasila?” tiang nakonin I Luh, kurenan tiangě aně mabalih tivi sambilanga nyilsil kacang kedelě malablab. Ia manggutan dogěn.
“To… Selěvel Nyai dogen hafal pancasila, masak calon Putri Indonesia sing hafal. Apa kata dunia?” Piiih…semangat pesaja tiang ngaraos, kanti kacang kedelěně makeplis uli bibihě.

I Luh ber dangsah dogěn panampině. Tusing sanget cara dugasě mabalih kurenaně BCL mati. Dugasě ento ia ngeling sigsigan, buka ia aně balu. Hěran tiang, dadi kurenan pisaga pangelingina, kurenan gelah pisuh temaha? Lěngkongě…

“Kěnkěn pendapat Nyaině?” matakon tiang sambilang ngěmpos kedelěně abatu.
“Biasa dogěn” dangsah pasautně.
“Maksudně?”
“Anak ye grogi. Di panggung pabalih anak se Indonesia, ambat ngetor bayuně. Sing hafal bukan berarti sing nawang!” kinyukaně I Luh sayan rames.
“Ga bolěh gitu dong. Ini level Putri Indoněsia.” Tiang sayan sengit ngaraos sambilang nyokot kedelě buin abatu. Sagět liman tiangě tampokanga. Mataně I Luh nengěng buka matan barongě colěkin balsem!
” Nah…Jani Icang nakonin Bli. Nyěn adaně anakě luh uli Badung aně ajak Bli masayang-sayangan di hapěně! ” sahasa ia ngablukin tiang hapě. Celekotokaně…hapě tiangě bukaka…
Mběěě…Cara maling cawet kedapetan Hansip, prajani ngetor bayuně….
” A… A… Aně kěn?” pegat pegat pasaut tiangě.
“Mběěě…misi matakon aně kěn…Artině liu ně selingkuhan Blině?” I Luh nyansan brangti, jani gisina baong bajun tiangě cara prěman nagih kakěcěr.
Kinceh bol tiangě…
“Orahang…Nyěn dogěn?!” mimih…cara perěntah nipong…

Tiang kalah nyali…terpaksa ngaku…

“Satu…Stěvy Wulandari Děwi
Dua…Něly Puspita Wati
Tiga…Stěny Ratih Paramita
Empat….eee….eee…Nia…eee…
Lima…eeee…Ayu…eee…eee…”

“Sing hafal bukan berarti sing nawang. Sing kěto?!” I Luh brangti karurakara, kedelěně makulit pakpak ilaga….

Adah…cawet tiangě belus….

(Macang Rumah Cinta Seribu Jendela)